Ռուսաստանի և Ուկրաինայի միջև ընթացող բանակցություններում այժմ դադար է. Պեսկով

Ռուսաստանի նախագահի մամուլի քարտուղարը հայտարարել է, որ Մոսկվայի և Կիևի միջև Վաշինգտոնի միջնորդությամբ ընթացող բանակցություններում այժմ դադար է:

«Սակայն տնտեսական հարցերով ռուս-ամերիկյան երկկողմ աշխատանքային խմբի շրջանակներում շփումները շարունակվում են»,- հավելել է Դմիտրի Պեսկովը։

Միևնույն ժամանակ, Կրեմլի խոսնակը նշել է, որ Ռուսաստանը կշարունակի գործակցել Ուկրաինայի հետ գերիների և զոհված զինծառայողների մարմինների փոխանակման հարցով։

Ավելի վաղ հայտարարվել էր, որ ռուս-ուկրաինական կարգավորման բանակցային գործընթացը դադարեցվել է Մերձավոր Արևելքում զարգացումներով պայմանավորված:

Այս ֆոնին Կիևը և Մոսկվան հայտնում են փոխադարձ հարվածների մասին: Օդեսայում բնակելի շենքեր են վնասվել, առնվազն 3 մարդ է վիրավորվել: Ռուսաստանի ՊՆ տվյալով՝ ուկրաինական ուժերն էլ 130-ից ավելի ԱԹՍ են արձակել Դաշնության ուղղությամբ: Թիրախում են հայտնվել Կրասնոդարի երկրամասը, Կուրսկի, Ռոստովի մարզերը և այլ տարածքներ: