Իրանը ղեկավարելու համար կա երեք շատ լավ թեկնածու. Թրամփ

The New York Times-ի հետ հարցազրույցում ԱՄՆ նախագահ Դոնալդ Թրամփը հայտարարել է, որ գերագույն առաջնորդ Ալի Խամենեիի մահից հետո Իրանը ղեկավարելու համար կա «երեք շատ լավ թեկնածու»՝ առանց նշելու, թե ում ի նկատի ունի։ Մասնագետները տարբեր տեսություններ են առաջ քաշել՝ այաթոլլահ Խամենեիի որդուց և հանրապետության հիմնադրի թոռից մինչև Իրանի վերջին շահի՝ Ռեզա Փահլևիի որդին։

Սպիտակ տան ղեկավարը թվարկել է նաև մի քանի տարբերակ, թե, իր կարծիքով, ինչպիսին կարող է լինել Իրանում իշխանության փոխանցման ընթացակարգը: «Կարծում եմ այն, ինչ մենք արեցինք Վենեսուելայում, իդեալական, կատարյալ սցենար է: Բոլորը պահպանեցին իրենց աշխատատեղերը, բացի երկու մարդուց»,- ասել է Թրամփը: ԱՄՆ զինվորականների կողմից նախագահ Մադուրոյի և նրա կնոջ ձերբակալությունից հետո երկրի կառավարության անդամների մեծ մասը պահպանել է իր պաշտոնները՝ պատրաստակամություն հայտնելով համագործակցել Վաշինգտոնի հետ:

Daily Mail-ի հետ հարցազրույցում էլ Դոնալդ Թրամփը հայտարարել է, որ Իրանում ռազմական գործողությունը «հնարավոր է» տևի չորս շաբաթ։ Նրա խոսքով՝ ամեն ինչ ընթանում է ըստ ծրագրի։ Սպիտակ տան ղեկավարը պնդել է, որ ԱՄՆ-ն «ոչնչացրել է» Իրանի ամբողջ ղեկավարությանը՝ հավելելով, որ խոսքը, հավանաբար, 48 անձի մասին է։ Գործողության մեկնարկից մեկ օր առաջ փոխնախագահ Ջեյ Դի Վենսը Washington Post-ին ասել է, որ Իրանի հետ երկարատև պատերազմ չի լինի։

Ամերիկայի նախագահը նաև չի բացառել Թեհրանի հետ հետագա բանակցությունները, միաժամանակ նշել է, որ «իրանցիները պետք է խոսեին անցյալ շաբաթ, ոչ թե այս»: