Սթարմերը հայտարարել է Մեծ Բրիտանիայի վարչապետի պաշտոնում մնալու մտադրության մասին

Մեծ Բրիտանիայի վարչապետ Քիր Սթարմերը հայտարարել է իր պաշտոնում մնալու մտադրության մասին: Վերջին 24 ժամվա ընթացքում վարչապետի թիմի երկու ազդեցիկ անդամ հրաժարական է տվել:

Վարչապետի աշխատակազմի ղեկավար Մորգան Մաքսուինին այդ քայլին է դիմել ԱՄՆ-ում Մեծ Բրիտանիայի նախկին դեսպան Փիթեր Մանդելսոնի հետ կապված սկանդալից հետո: Մանդելսոնը, ինչպես պարզվել է Էպշտեյնի գործի արտահոսած ֆայլերից, վերջինիս հետ կիսվել է պետական գաղտնի տեղեկություններով:

Մաքսուինին հայտարարել է, որ իր վրա է վերցնում Սթարմերին տված խորհրդի «ամբողջ պատասխանատվությունը»՝ 2024 թվականի դեկտեմբերին Փիթեր Մանդելսոնին ԱՄՆ-ում Մեծ Բրիտանիայի դեսպան նշանակելու համար: Մաքսուինից հետո պաշտոնը լքել է Սթարմերի հասարակայնության հետ կապերի ծառայության տնօրեն Թիմ Ալանը:

Քաղաքական ճգնաժամը, որը բռնկվել է Փիթեր Մանդելսոնի և Ջեֆրի Էպշտեյնի կապերի շուրջ, սպառնում է վերջ դնել Սթարմերի ղեկավարությանը՝ Լեյբորիստական ​​կուսակցության հաղթանակից 18 ամիս անց՝ գրում են ԶԼՄ-ները:

Bloomberg-ը, հղում անելով իշխող Լեյբորիստական ​​կուսակցության աղբյուրներին, հաղորդել է, որ Սթարմերի՝ շաբաթվա վերջում վարչապետ մնալու հավանականությունը «50-50» է։

Sky News-ը, սակայն, հաղորդել է, որ Սթարմերը կփորձի համոզել իր կուսակիցներին չպահանջել իր հրաժարականը։ Սպասվում է նրա ելույթը Համայնքների պալատում (բրիտանական խորհրդարանի ստորին պալատ) Լեյբորիստական ​​կուսակցության խմբակցության առջև։