Ժնևի բանակցություններից հետո ԱՄՆ-ի և Իրանի միջև տարաձայնությունները պահպանվել են. WSJ

ԱՄՆ-ի և Իրանի միջև բանակցությունների երրորդ փուլը, որը փետրվարի 26-ին ավարտվել է Ժնևում, չի օգնել հաղթահարելու առանցքային հարցերի շուրջ կողմերի տարաձայնությունները, հաղորդում է The Wall Street Journal-ը՝ հղում անելով աղբյուրներին։

Նրանց տեղեկություններով՝ բանակցությունների ընթացքում ԱՄՆ նախագահի հատուկ բանագնաց Սթիվ Ուիթքոֆը և նախագահի փեսա Ջարեդ Քուշներն Իրանից պահանջել են ապամոնտաժել Ֆորդոյում, Նաթանզում և Սպահանում գտնվող գլխավոր միջուկային օբյեկտները: Բացի այդ, նրանք հայտարարել են, որ Թեհրանը պետք է ԱՄՆ ուղարկի Իրանում մնացած ամբողջ հարստացված ուրանը։

WSJ-ի աղբյուրները նշել են, որ ԱՄՆ-ն գործարքի շրջանակներում Իրանին առաջարկել է պատժամիջոցների միայն նվազագույն մեղմացում, ինչը նույնպես դժգոհություն է առաջացրել Թեհրանի մոտ: Թերթի զրուցակիցների խոսքով՝ Վաշինգտոնում ցանկանում են, որ Իրանը նախ ցուցադրի համաձայնագրի պայմանների պահպանումը երկար ժամանակահատվածում և միայն դրանից հետո պահանջի սահմանափակումների հետագա վերացում:

Միաժամանակ Օմանի արտաքին գործերի նախարար Բադր ալ Բուսաիդին նախօրեին հայտարարել է, որ Ժնևում ԱՄՆ-ի և Իրանի բանակցությունների երրորդ փուլն ավարտվել է և հնարավոր է եղել հասնել զգալի հաջողությունների: