Կոսը բարձր է գնահատել Երևանի ու Բաքվի միջև կարգավորման գործընթացում առաջխաղացումը

Թուրքիայի արտաքին գործերի նախարարը Լյուքսեմբուրգում միջտարածաշրջանային անվտանգության և կապակցվածության հարցերով նախարարական հանդիպման շրջանակում հանդիպել է  Եվրամիության ընդլայնման հարցերով հանձնակատար Մարթա Կոսի հետ: 

Կովկասում խաղաղության ամրապնդումը մեզ եզակի հնարավորություն է տալիս՝ զարգացնելու տարածաշրջանային գործակցությունը և Եվրոպայի անկախությունը՝ Հաքան Ֆիդանի հետ հանդիպման ավարտին X-ի իր էջում գրել է Կոսը:

Նրա խոսքով՝ Հայաստանի և Ադրբեջանի միջև խաղաղ կարգավորման գործընթացում առաջխաղացումը փոխում է տարածաշրջանի քաղաքական և տնտեսական լանդշաֆտը։ Եվրահանձնակատարը բարձր է գնահատել այն փաստը, որ տասնամյակների ընթացքում առաջին անգամ Եվրոպան և Ասիան կապող առևտրային ու տրանսպորտային ուղիները ապաշրջափակելու իրական հնարավորություն է ստեղծվել։ Եվրոպայից մինչև Չինաստան՝ բոլորը գիտակցում են այս պահի կարևորությունը՝ ընդգծել է հանձնակատարը։