Այստեղ ենք հազարավոր կյանքեր փրկելու համար. Սպիտակ տունը հրապարակել է Թրամփի և Զելենսկու համատեղ լուսանկարը

Սպիտակ տունը հրապարակել է ԱՄՆ և Ուկրաինայի նախագահներ Դոնալդ Թրամփի և Վոլոդիմիր Զելենսկու համատեղ լուսանկարը։

Լուսանկարին կից գրված է.

«Մենք մարդկանց չենք կորցնում, մենք փող չենք ծախսում, մենք վարձատրվում ենք զինամթերքի և հրթիռների համար… Մենք շատ լավ գործարք ենք կնքել ՆԱՏՕ-ի հետ: Դրա համար չէ, որ մենք այստեղ ենք։ Մենք այստեղ ենք` հազարավոր կյանքեր փրկելու համար»։

Ավելի վաղ, Զելենսկու հետ բանակցությունների ժամանակ, Թրամփը աջակցություն էր հայտնել ուկրաինական ճգնաժամի լուծմանն ուղղված եռակողմ հանդիպման կազմակերպմանը։

Վերլուծաբանները կարծում են, որ Զելենսկու այցն այժմ նոր երանգ է ստանում. Կիևը մտահոգություն է հայտնում, որ Թրամփի և Պուտինի միջև առաջիկա բանակցությունները կարող են ազդել ԱՄՆ-ի որոշումների վրա՝ Ուկրաինային ռազմական օգնության ծավալի և ուղղության վերաբերյալ։

Նախօրեին հայտնի էր դարձել, որ Թրամփը նախնական համաձայնություն է տվել Վլադիմիր Պուտինի հետ հանդիպել Բուդապեշտում։ Իր հերթին Զելենսկին մամուլի ասուլիսի ժամանակ շեշտել է, որ «Ուկրաինան խաղաղություն է ուզում, իսկ Ռուսաստանը՝ ոչ»։ Նա նշել է, որ նախևառաջ անհրաժեշտ է համաձայնության հասնել Ուկրաինայում կրակի դադարեցման շուրջ։