Հայաստանի և Ադրբեջանի միջև ռազմական բախումն արդիական չէ. Հաջիև

Հայաստանի և Ադրբեջանի միջև ռազմական բախումն արդիական չէ, օրակարգում էսկալացիա չկա՝ հայտարարել է Ադրբեջանի նախագահի օգնական Հիքմեթ Հաջիևը:

«Մնացել է մի քանի վիճելի հարց, ինչը բնական է։ Հենց դրա համար էլ կան դիվանագիտությունը և երկխոսությունը»,- շեշտել է նա, հավելել՝ երկու երկրի միջև խաղաղության համաձայնագրի ստորագրման ուղղությամբ աշխատանքները շարունակվում են: 

Մեկնաբանելով Աբու Դաբիում Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև տեղի ունեցած բանակցությունները՝ Հաջիևը հայտարարել է, որ հանդիպումը կառուցողական է եղել: 

«Լավ է, որ խաղաղության ամբողջ գործընթացն այժմ մեր ձեռքերում է։ Որոշումներ են կայացնում միայն Հայաստանն ու Ադրբեջանը՝ ո՛չ Ռուսաստանը, ո՛չ Եվրամիությունը, ոչ էլ Միացյալ Նահանգները։ Սենյակում ներկա էին միայն հայերն ու ադրբեջանցիները։ Քաղաքակիրթ երկխոսություն ունեցանք՝ չնայած դեռևս դիվանագիտական հարաբերություններ չունենք»,- մանրամասնել է պաշտոնյան։ 

Միևնույն ժամանակ, Հաջիևը հերթական անգամ պնդել է, որ Մինսկի խումբը պետք է լուծարվի: Նա նաև մեղադրել է Հայաստանին՝ Ադրբեջանի նկատմամբ, իբր, տարածքային պահանջներ ունենալու համար:

Հաջիևն անդրադարձել է նաև տարածաշրջանային հաղորդակցությունների մասով ամերիկյան առաջարկին, ընդգծել՝ դա Հայաստանի ներքին գործն է:

Անդրադառնալով Մոսկվա-Բաքու շփումներին՝ Հաջիևը նշել է, որ երկկողմ հարաբերություններում հիմնարար փոփոխություններ չեն եղել, սակայն վերջին ամիսներին որոշակի թյուրըմբռնումներ և աճող լարվածություն է նկատվել։ Նա կոչ է արել Ռուսաստանին պատասխանատվություն ստանձնել AZAL ինքնաթիռի խոցման համար: