Իսլանդիան ԵՄ-ի հետ պաշտպանական գործընկերության բանակցություններ է սկսում

Եվրոպական հանձնաժողովի նախագահ Ուրսուլա ֆոն դեր Լայենը հայտարարել է, որ ԵՄ-ն կսկսի բանակցություններ Իսլանդիայի հետ անվտանգության և պաշտպանության գործընկերության հարցով։

«Մենք ավելի սերտորեն կհամագործակցենք հիբրիդային սպառնալիքներին արձագանքման, քաղաքացիական պաշտպանության և անվտանգ հաղորդակցության ոլորտներում»,- ասել է Ֆոն դեր Լայենը X-ում հրապարակված գրառման մեջ՝ Կեբլավիկում Իսլանդիայի վարչապետ Կրիստրուն Ֆրոստադոտիրի հետ մամուլի ասուլիսից հետո։ Ֆրոստադոտիրը հույս է հայտնել, որ բանակցությունները կավարտվեն մինչև տարեվերջ։

ԵՄ-ի հետ այս համաձայնագիրը կախված չէ ՆԱՏՕ-ին Իսլանդիայի անդամակցությունից և ԱՄՆ-ի հետ գոյություն ունեցող պաշտպանական համաձայնագրերից, հայտնել է RÚV ազգային հանրային հեռուստաընկերությունը:

Հանդիպման ժամանակ Ֆրոստադոտիրը նաև հայտարարել է, որ շուտով կսկսվի Եվրամիության հետ Իսլանդիայի առևտրի պայմանների համապարփակ վերանայումը, որի մասին հայտարարվել էր 2023 թվականի դեկտեմբերին:

Դեկտեմբերին Իսլանդիայի կառավարությունը հայտարարել է, որ մտադիր է ԵՄ-ին անդամակցության հարցը հանրաքվեի դնել մինչև 2027 թվականը։