Ռադան քվեարկել է Ուկրաինայի հակակոռուպցիոն ծառայությունների անկախության սահմանափակման օգտին

Ուկրաինայի Գերագույն ռադան երկրորդ ընթերցմամբ հավանություն է տվել օրինագծի փոփոխություններին, որոնք զգալիորեն սահմանափակում են Ազգային հակակոռուպցիոն բյուրոյի (ԱՀԲ) և Մասնագիտացված հակակոռուպցիոն դատախազության (ՄՀԴ) անկախությունը։ Կողմ է քվեարկել 263 պատգամավոր, այդ թվում՝ 185-ը իշխող «Ժողովրդի ծառա» կուսակցությունից, դեմ՝ 13 պատգամավոր, ևս 13-ը ձեռնպահ են մնացել։

Հաստատված փոփոխությունները թույլ են տալիս Ուկրաինայի գլխավոր դատախազին ՄԴՀ-ի լիազորությունները պատվիրակել այլ դատախազների և պահանջել նյութեր ցանկացած գործից։ Բացի այդ, գլխավոր դատախազը կկարողանա ԱՀԲ-ին տալ պարտադիր գրավոր հրահանգներ և բյուրոյի քրեական վարույթը հանձնարարել այլ մարմինների:

Նույն օրն ավելի ուշ Գերագույն ռադայի կայքում հայտնվել է տեղեկատվություն պետության ղեկավարի կողմից օրինագծի ստորագրման մասին։

Ուկրաինայի ընդդիմադիր պատգամավորները դեմ են փոփոխություններին՝ պատճառաբանելով, որ դրանք հակակոռուպցիոն երկու մարմինները վերածում են «դեկորատիվ օրգանի» և նրանց գործունեությունը լիովին կախվածության մեջ են դնում գլխավոր դատախազից։

Ռադայի կողմից փոփոխությունների հաստատմամբ մտահոգություն է հայտնել Եվրոպական հանձնաժողովի ընդլայնման հարցերով հանձնակատար Մարթա Կոսը: «ԱՀԲ-ի և ՄՀԴ-ի նման անկախ մարմինները կարևոր դեր են խաղում ԵՄ-ին Ուկրաինայի անդամակցելու ճանապարհին: Օրենքի գերակայությունը մնում է Եվրամիությանն անդամակցելու բանակցությունների կենտրոնում»,- գրել է նա X սոցիալական ցանցում:

Որոշումը քննադատել է նաև Ֆրանսիան: «Ուկրաինայի՝ կոռուպցիայի դեմ պայքարի մարմինների գործունեությունը սահմանափակող օրինագծի ստորագրումը Վոլոդիմիր Զելենսկու կողմից  չի համապատասխանում Եվրամիությանը միանալու հետագծին»,- չորեքշաբթի հայտարարել է Ֆրանսիայի արտաքին գործերի նախարարության եվրոպական հարցերով նախարար Բենջամին Հադդադը։