Ուկրաինայի ապառազմականացումը «կարմիր գիծ» է Եվրոպայի համար. Լըկորնյու

Ուկրաինայի ապառազմականացման Ռուսաստանի պահանջն անընդունելի է եվրոպական երկրների համար, Valeurs Actuelles-ի հետ հարցազրույցում ասել է Ֆրանսիայի պաշտպանության նախարար Սեբաստիան Լըկորնյուն։

«Մեզ համար բացարձակ կարմիր գիծ է Ուկրաինայի ապառազմականացումը»,- ասել է նա Ուկրաինային «աջակցել ցանկացողների կոալիցիայի» հանդիպումից առաջ։

«Մենք չենք կարող մերժել Ուկրաինայի անդամակցությունը ՆԱՏՕ-ին և միևնույն ժամանակ համաձայնել, որ այն այլևս բանակ չունենա։ Ուկրաինացիները պետք է կարողանան ապահովել իրենց սեփական անվտանգությունը»,- ընդգծել է պաշտոնյան։

Հանդիպումը կկայանա հուլիսի 10-ին՝ Հռոմում: Իտալիայի մայրաքաղաքում կանցկացվի նաև Ուկրաինայի վերականգնման խնդրին նվիրված համաժողով։

Գերմանիայի կանցլեր Ֆրիդրիխ Մերցն էլ Բունդեսթագում հայտարարել է, որ Ուկրաինայում հակամարտությունը դիվանագիտական ճանապարհով լուծելու բոլոր հնարավորությունները սպառված են: Միաժամանակ կանցլերը խոստացել է շարունակել աջակցել Կիևին, հաղորդում են եվրոպական լրատվամիջոցները:

ԱՄՆ նախագահ Դոնալդ Թրամփի հետ շփումների ժամանակ Մերցը պնդել է, որ Միացյալ Նահանգները շարունակի Ուկրաինային տրամադրել ինչպես ռազմական, այնպես էլ քաղաքացիական օգնություն։