Ռուսաստանը համաձայն չէ Թրամփի հետ, որ ռուս-ուկրաինական հակամարտությունը նման է մանկական կռվի. Պեսկով

Մոսկվան համաձայն չէ ԱՄՆ նախագահ Դոնալդ Թրամփի այն խոսքին, որ Ռուսաստանի և Ուկրաինայի միջև հակամարտությունը նման է մանկական կռվի։ Այդ մասին, ինչպես մեջբերում է ՏԱՍՍ-ը, հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Մեզ համար սա գոյութենական հարց է, մեր ազգային շահերի, անվտանգության հարցն է, մեր և մեր երեխաների, մեր երկրի ապագայի հարցն է»,- ասել Է Կրեմլի խոսնակը:

Ավելի վաղ The New York Times-ը (NYT), հղում անելով Թրամփի խորհրդականներին, գրել էր, որ պետության ղեկավարը դժգոհ է ինչպես Ռուսաստանի նախագահ Վլադիմիր Պուտինից, այնպես էլ Ուկրաինայի նախագահ Վոլոդիմիր Զելենսկուց։

Ըստ Թրամփի՝ Ռուսաստանն ու Ուկրաինան «այգում խելագարի պես կռվում են երկու փոքրիկ երեխաների նման»։ «Դու, իհարկե, թույլ ես տալիս նրանց որոշ ժամանակ կռվել, որ հետո բաժանես»,- հավելել է ԱՄՆ նախագահը։

Նա նաև նշել է, որ ռուսական կողմից պատասխան է սպասում Ռուսաստանի տարածքում ռազմական օդանավակայանների վրա ուկրաինական դրոնների հարձակմանը: Թրամփը հավաստիացրել է, որ հեռախոսազրույցի ժամանակ Պուտինին «խնդրել է» չպատասխանել ուկրաինական վերջին գործողությանը: