Ուկրաինական անօդաչու թռչող սարքերը հարձակվել են Տամբովի վառոդի գործարանի վրա

Ուկրաինական անօդաչու թռչող սարքերը հունիսի 10-ի լույս 11-ի գիշերը հարձակվել են Ռուսաստանի Կոտովսկ քաղաքում գտնվող Տամբովի վառոդի գործարանի վրա։ Քաղաքում լսվել է առնվազն 10 պայթյուն, հաղորդում են ռուսական Telegram ալիքները՝ հղում անելով տեղի բնակիչներին։

Տամբովի վառոդի գործարանը հարձակման է ենթարկվել նաև 2023 թվականի նոյեմբերին և 2025 թվականի հունվարին։ Ուկրաինայի ազգային անվտանգության և պաշտպանության խորհրդին կից ապատեղեկատվության հակազդման կենտրոնի ղեկավար Անդրեյ Կովալենկոն այս ձեռնարկությունն անվանել է «ռուսական բանակի համար պայթուցիկ նյութերի հիմնական մատակարարներից մեկը»։

Ռուսաստանի պաշտպանության նախարարության տվյալներով՝ անցած գիշեր «որսացել և խոցել են» ուկրաինական 32 անօդաչու թռչող սարք Վորոնեժի, Կուրսկի, Տամբովի, Ռոստովի մարզերի տարածքում և Ղրիմի ափերի մոտ։

Ուկրաինական հարձակումից հետո Կալուգայի և Սարատովի օդանավակայաններում մտցվել են ինքնաթիռների ժամանման և մեկնման ժամանակավոր սահմանափակումներ։