Էրդողանը վախենում է նախագահի ընտրությունում պարտվելուց. Օզգյուր Օզել
Թուրքական ընդդիմադիր Ժողովրդահանրապետական կուսակցության առաջնորդ Օզգյուր Օզելը կարծում է, որ Ստամբուլի քաղաքապետ Էքրեմ Իմամօղլուի ձերբակալությունը պայմանավորված է Էրդողանի՝ նախագահի ընտրությունում պարտվելու վախով։
«Իմամօղլուն երբեք ընտրություններում չի պարտվել, Էրդողանն էլ, որը նույնպես երբեք չի պարտվել, բազմիցս ասել է, որ «ով վերցնի Ստամբուլը, կվերցնի ամբողջ երկիրը»: Էրդողանը ավելի շատ է հավատում Իմամօղլուի հաղթանակին նախագահի ընտրությունում, քան ես»,- ասել է Օզելը։
Ձերբակալությունից առաջ Իմամօղլուն հասցրել է տեսանյութ ձայնագրել, որում տեղի ունեցող իրադարձությունն անվանել է բացահայտ անարդարություն և հայտարարել, որ շարունակելու է պայքարը:
Այս պահին Ստամբուլի քաղաքապետարանի շենքը շրջափակված է ոստիկաններով։ Քաղաքում ցանկացած հավաք արգելված է։
