Վաշինգտոնը պետք է դիվանագիտական բոլոր միջոցներով ճնշում գործադրի Ալիևի վրա. Փալոն
ԱՄՆ Կոնգրեսի Թոմ Լանթոսի անվան մարդու իրավունքների հանձնաժողովի՝ Լեռնային Ղարաբաղի բնակչության պաշտպանության հարցով լսումների ժամանակ Ներկայացուցիչների պալատի հայկական հարցերով հանձնախմբի համանախագահ Ֆրենկ Փալոնը նշել է, որ Ալիևը բանակցություններ է վարում Հայաստանի հետ, սակայն շարունակում է արգելափակել Լաչինի միջանցքը և փորձում է հայաթափել Լեռնային Ղարաբաղը։
«Ալիևի ռեժիմը նույնիսկ չի թաքցնում, որ փորձում է ցեղասպանություն իրականացնել, չի թաքցնում նաև, որ ներխուժել է Հայաստանի տարածք։ Նա ցանկանում է զրկել Արցախի բնակչությանը իր նախնիների երկրում ազատ և արժանապատիվ ապրելու հնարավորությունից։ Սա էթնիկ զտման քաղաքականություն է։
2020 թվականի պատերազմից հետո, ցավոք, քիչ բան արվեց Ադրբեջանին պատասխանատվության ենթարկելու համար։ Ալիևը զգաց, որ կարող է նաև արգելափակել Լաչինի միջանցքը։ Այժմ Վաշինգտոնը պետք է դիվանագիտական բոլոր միջոցներով ճնշում գործադրի Ալիևի վրա՝ դադարեցնելու այս ամենը»,- ասել է Փալոնը։
Նրա խոսքով՝ հիասթափության և մտահոգության մասին համաշխարհային առաջնորդների հայտարարությունները բավարար չեն, դրանք մինչ այժմ չեն դադարեցրել Ալիևի մահաբեր արշավը:
