ԱՄՆ դեսպանատուն. «Այսօր սև օր է վրացական ժողովրդավարության համար» |
Վրաստանում ԱՄՆ դեսպանատունը հայտարարություն է տարածել՝ կապված օտարերկրյա գործակալների մասին օրինագծերի հետ, որոնք այսօր քննարկվում են Վրաստանի խորհրդարանում։
«Այսօր սև օր է վրացական ժողովրդավարության համար։ Խորհրդարանի կողմից Կրեմլի կողմից ոգեշնչված օրենքների շարունակական քննարկումն անհամատեղելի է Եվրոպային ինտեգրվելու և երկրի ժողովրդավարական զարգացման Վրաստանի հստակ ցանկության հետ:
Այս օրենքների ընդունումը կվնասի ռազմավարական գործընկերների հետ Վրաստանի հարաբերություններին և կխաթարի այն կարևոր աշխատանքը, որ վրացական շատ կազմակերպություններ անում են իրենց համաքաղաքացիներին օգնելու համար։
Այս գործընթացը և օրինագծերը իրական հարցադրումներ են առաջացնում իշխող կուսակցության՝ եվրաատլանտյան ինտեգրմանը նվիրվածության վերաբերյալ։
«Ժողովրդի իշխանություն» շարժման անդամները, որոնք պաշտոնապես հայտարարեցին իշխող «Վրացական երազանք» կուսակցությունից դուրս գալու մասին, խորհրդարան են ներկայացրել երկու օրինագիծ՝ «Օտարերկրյա ազդեցության թափանցիկության մասին» և «Օտարերկրյա գործակալների գրանցման մասին»: «Ժողովրդի իշխանության» անդամներն առաջին օրինագիծն անվանում են «վրացական», երկրորդը՝ «ամերիկյան»։ Սակայն վերջինս չի պարունակում ամերիկյան օրենքի 613-րդ կետը, որում, ըստ «F» կետի, երկրի նախագահը կազմում է ԱՄՆ-ի գործընկեր երկրների ցուցակը։ Այդ երկրներն ու նրանց ներկայացուցիչները չպետք է գրանցվեն որպես «օտարերկրյա գործակալներ»։
Արեւմտյան առաջատար երկրների դեսպանատներն ու միջազգային կառույցները դրանց ընդունումը հայտարարել են ծայրահեղ անցանկալի։ Նրանց կարծիքով, դա կարող է բացասաբար անդրադառնալ Վրաստանի եվրաինտեգրման գործընթացի վրա։
Նմանատիպ գնահատական են տվել ԱՄՆ պետքարտուղարության խոսնակ Նեդ Փրայսը, Եվրոպայի խորհրդի մարդու իրավունքների հանձնակատար Դունյա Միյատովիչը, ԵՄ դեսպան Պավել Գերչինսկին, ԱՄՆ դեսպան Քելլի Դեգնանը և Մեծ Բրիտանիայի դեսպան Մարկ Քլեյթոնը։ ԱՄՆ Ազգային անվտանգության խորհուրդը Ֆիոնա Հիլն ասել է. «Վրաստանը Պուտինի համար դարձել է հարմարավետ վայր… Դա այլևս չի կարող լինել ժողովրդավարության այն ճառագայթը, որը մենք գովազդում էինք 2008 թվականին»:
Օրինագծին դեմ են արտահայտվել վրացական հասարակական կազմակերպությունները, լրատվամիջոցները, աշխատավորների արհմիությունները, ֆերմերների ասոցիացիան և ուսանողական կազմակերպությունները: Այս օրինագիծը չընդունելու կոչ են արել նաև ՄԱԿ-ի Վրաստանի գրասենյակը և USAID-ի ղեկավարը։ Չնայած Արեւմուտքի եւ տեղի հասարակության նման սուր արձագանքին, «Վրացական երազանքի» առաջնորդ Իրակլի Կոբախիձեն ասել է, որ «երկու օրինագծերից մեկն անպայման կընդունվի»։
Վրաստանի նախագահ Սալոմե Զուրաբիշվիլին հայտարարել է, որ վետո է դնելու «օտարերկրյա գործակալների մասին» օրենքի վրա։ Սակայն ավելի վաղ Վրաստանի խորհրդարանը հաղթահարել էր նախագահի վետոն ԵՄ կողմից քննադատվող գաղտնալսման մասին օրենքի վրա։
