Ռուսաստանի արտգործնախարար Սերգեյ Լավրովը իտալական Mediaset հեռուստաընկերությանը տված հարցազրույցում ներկայացրել է Մոսկվայի պահանջը Կիևին:

Նրա խոսքով՝ Ռուսաստանը պահանջում է, որ Ուկրաինայի նախագահ Վոլոդիմիր Զելենսկին նեոնացիստական ​​կազմավորումների անդամներին հրամայի ազատ արձակել պատանդ պահվող խաղաղ բնակիչներին և դադարեցնի դիմադրությունը։

Նա ընդգծել է, որ ռուսական կողմը չի նախատեսում Ուկրաինայում ռեժիմի փոփոխություն։ Լավրովը նշել է, որ Ուկրաինայի ղեկավարը կարող է խաղաղություն բերել իր երկրին, և հավելել է, որ Զելենսկին հնարավորություն ուներ դառնալու «խաղաղության նախագահ», ինչպես նա ներկայացել էր նախընտրական քարոզարշավի ժամանակ, բայց փոխարենը հրապարակավ հայտարարեց, որ երբեք չի կատարի Մինսկի պայմանավորվածությունները։

Անդրադառնալով Ուկրաինայում հատուկ գործողության ավարտի հնարավոր վերջնաժամկետին, ՌԴ ԱԳ նախարարը հայտարարել է, որ այն կավարտվի, երբ իրականացվեն բոլոր դրված նպատակները։

«Ռուս զինվորականները արհեստականորեն իրենց գործողությունները չեն հարմարեցնի ինչ-որ ժամանակի»,- ասել է Լավրովը՝ պատասխանելով ռազմական գործողությունները մինչև մայիսի 9-ը ավարտելու մասին հարցին։