Դոնբասում սկսվել է Ռուսաստանի լայնածավալ հարձակումը: Այս մասին հայտարարել է Ուկրաինայի նախագահ Վոլոդիմիր Զելենսկին՝ հավելելով, որ Մոսկվան կենտրոնացրել է բանակի զգալի մասը:

«Այս ճակատամարտին Ռուսաստանը երկար է պատրաստվել»,- շեշտել է Ուկրաինայի ղեկավարն իր ուղերձում՝ վստահեցնելով, որ ուկրաինական բանակը կռվելու է մինչև վերջ՝ պաշտպանելու այն, ինչն ուկրաինական է:

Զելենսկին խոսել է նաև Եվրամիությանն անդամակցության մասին՝ ընդգծելով, որ Ուկրաինայի պատմության մեջ դա աննախադեպ հնարավորություն կդառնա երկրի վերականգնման և արդիականացման համար:

Ուկրաինայի նախագահը նաև պատմական է որակել Եվրամիությանն անդամակցելու կարևոր քայլերից մեկն իրագործելը: Նա տեղեկացրել է, որ Կիևը հանձնել է Եվրահանձնաժողովի նախագահ Ուրսուլա ֆոն դեր Լայենից և Եվրոպական դիվանագիտության ղեկավար Ժոզեպ Բորելից ստացած ԵՄ անդամակցության թեկնածուի կարգավիճակ ստանալու համար լրացված հարցաթերթիկը:

Իր ելույթում Վոլոդիմիր Զելենսկին կրկին հորդորել է Ռուսաստանի վրա ճնշում գործադրել պատժամիջոցներով: