Մոմավառություն՝ ի պահպանություն հայոց սրբավայրերի
Armenianchurch.ge -հոկտեմբերի 14-ին Վրաստանի հայ համայնքը, կիրակնօրյա Սուրբ Պատարագից հետո, Թբիլիսիի Սուրբ Գևորգ առաջնորդանիստ և Սուրբ Էջմիածին եկեղեցիներից հոգևոր հայրերի առաջնորդությամբ կազմակերպեց խաղաղ քայլերթ դեպի Հավլաբարի կենտրոնում Ֆիգների փողոցի (Փերիսցվալեբա փողոցի թիվ 
21 հասցեով) հարակից տարածքում ավերակների վերածված Շամքորեցոց Սուրբ Աստվածածին (Կարմիր Ավետարան) եկեղեցի:
Քայլերթի նպատակն էր խաղաղ մոմավառությամբ, ի պահպանություն հայոց սրբավայրերի երկրի իշխանության ուշադրությունը հրավիրել պատմական հուշարձանի հարակից տարածքում գործող և նախատեսվող հասարակական վայրերի կառուցման թույլտվությանը: Քանի որ եկեղեցին գտնվում է վթարային վիճակում և հղի է բազմաթիվ վտանգներով, այն կարող է վտանգել տեղի բնակչության և այցելուների անվտանգությունը, ուստի անհրաժեշտ է միջոցներ ձեռնարկել կանխելու նման անօրեն շինությունների 
թույլտվությունը, որը խաթարում է պատմական հուշարձանի և Թբիլիսիում հայկական հետքի պահպանությանը:
Քայլերթի մասնակիցները միասնաբար աղոթելուց և մոմեր վառելուց հետո ավարտեցին իրենց խաղաղ 
գործողությունը, ափսոսանք հայտնելով հայոց պատմական եկեղեցու նման անմխիթար վիճակից:
19-րդ դարի առաջին կեսի կառույց Շամքորեցոց Սբ. Աստվածածին եկեղեցին կառուցվել է Գանձակից Թբիլիսի տեղափոխված շամխորցիների կողմից սեփական միջոցներով: Եկեղեցին գործել է մինչև խորհրդային կարգերի հաստատումը, ունեցել է իր ծխական դպրոցը, կալվածքները:
Խորհրդային տարիներին եկեղեցու շենքը գործածվել է տարբեր նպատակներով, վերածվել է հացի գործարանի, 
ապա պահեստի, ծառայել որպես վրաց նկարիչների արվեստանոց:
1989 թվակսնին եկեղեցին փլուզվել է երկրաշարժի հետևանքով: 1999 թվականի դրությամբ կանգուն վիճակում եկեղեցուց պահպանվում է միայն արևելյան ճակատը և նրան հարող որոշ հատվածներ: Վիրահայոց թեմը Շամքորեցոց եկեղեցին թեմին վերադարձնելու կամ եկեղեցին կոնսերվացնելու հարցով բազմիցս դիմել է Վրաստանի իշխանությանը:
2016 թվականի դեկտեմբերին եկեղեցու հարևանությամբ սկսվել են շինարարական աշխատանքներ, ինչը օր-օրի վնաս է հասցնում ճարտարապետական կառույցի հետագա պահպանմանը:
